ჯადოქრობა 21-ს საუკუნეში კვლავ აქტუალურია

“ანითა, მანითა, შავ ტარიანი დანითა, აგყრი-დაგჭრი ქვაბსა ჩაგყრი გვარლისასა,
შემოგინთებ ცეცხლ-გენიას, გაგაქროლებ თვალისათა, ფერო მოდი ფერთანა,
ხორცო მოდი ხორცთანა, გულო მოდი გულთანა, გულო ჩაჯექ ალაგასა.
ყვავი მოხარშე ისე, რომ ორთქლი არ გამოუვიდეს და იმისი წვენი დალიე, მორიელის სისხლი გაახმე და მიიღე, აქლემის ძვალი, ჯოჯოხეთის ქვა და ეშმაკის კიტრანა ერთმანეთში აურიე და მიიღე, ნახე როგორ გიამოს.”
ასე ექიმბაშობდა ყველასათვის ნაცნობი პერსონაჟი ფუფალა ქართული ფილმიდან “ნატვრის ხე.” ეს დიდი ხნის წინათ იყო, თუმცა დღესაც არიან ჩვენში უამრავი ექიმბაშები, ნათელმხილველები, ე.წ. მჩხიბავები და მკითხავები. მკითხავის საქმიანობა უძველესი დროიდან იღებს სათავეს, მეფეებსაც კი ნათელმხილველები ჰყავდათ, რომელთაც ხშირად ეკითხებოდნენ რჩევას. მე-16 საუკუნეში საფრანგეთში, დედოფალს, ეკატერინე მედიჩს საკუთარი ”პარფიუმერი,”ფლორენციელი რენე ჰყავდა, ყველამ იცოდა მისი “ჯადოქრობის” შესახებ, “რენეს სახლი იმდენად თავზარდამცემი იყო, რომ როცა გამვლელები ხიდზე გადადიოდნენ, ამ ადგილს შორი მანძილით შემოუვლიდნენ ხოლმე, თითქოს ეშინოდათ, ინანთალის სურნელი კედლიდან არ გამოვიდეს და ჩვენს ყნოსვას არ მოსწვდესო. უფრო მეტიც, მარჯვნივ და მარცხნივ მობინადრე მეზობლებს ცხადია შეეშინდათ და როგორც კი წმინდა მიხეილის ხიდზე რენე დასახლდა, ერთიმეორის მიყოლებით თავიანთი სახლებიდან აიბარგნენ.” (ალექსანდრე დიუმა “დედოფალი მარგო”) რენე გარდა იმისა, რომ პარფიუმერიას ამზადებდა და შიგ საწამლავს ურევდა, სიყვარულის გამოსაწვევად ცვილის თოჯინებს გულში ფოლადის ნემსს უყრიდა, შემდეგ შელოცვებს ამბობდა, როგორც კი დაასრულებდა, თოჯინის გულიდან სისხლის წვეთები ამოჟონავდა, რაც იმას ნიშნავდა, რომ შელოცვამ კარგად იმოქმედა. არა ერთი თქმულება და მითი გაგვიგონია ფარაონების შესახებ და თუ ამ მითებს დავუჯერებთ, ეგვიპტეშიც საკმაოდ გავრცელებული იყო ჯადოს მეშვეობით ფარაონების სიკვდილი ან ავადმყოფობა. აფრიკულ და სამხრეთ ამერიკულ ტომებში დღესაც შეხვდებით უამრავ მკითხავს, რომელიც თავს შავი მაგიის წარმომადგენელს უწოდებს. მათ ძველი ხალხი ჯადოქრებსა და კუდიანებს ეძახდა. ჯადოქრობის საქმიანობა სხვადასხვაგვარად იყო შეფასებული, მაგალითად, სასიყვარულო მაგია აღიქმებოდა ხან როგორც უწმინდური საქმე, რომელსაც ზიანი მოჰქონდა იმ ადამიანისათვის, რომლისთვისაც იყო გამიზნული, ხან კი როგორც დასაშვები საქმიანობა, მაგალითად ოჯახიდან წასული ქმრის მოსაბრუნებლად. საუკუნეების წინ მსოფლიოს მრავალ ქვეყანაში ხშირად უბრალო ადამიანებიც ფლობდნენ მაგიის გარკვეულ ცოდნას, მაგრამ არა იმ მოცულობით, როგორც ამ საქმის პროფესიონალნი, მაგიურ ცოდნას ქალები იყნებდნენ ბავშვების ავადმყოფობისგან განსაკურნებლად. არსებობდა ბატონის რისხვის, მეფის ავი თვალის, მეომრების ომში გადარჩენის და სხვა გასაჭირისგან თავის დასაღწევი შელოცვები. თუ იმდროინდელ თქმულებებს დავუჯერებთ, მაშინ ჱყველას სწამდა ჯადოქრების არსებობისა, რომლებსაც კავშირი ჰქონდათ იმქვეყნიურ შავ ძალებთან, მათი მონაყოლით, ისინი გარეგნულად ინიღბებოდნენ და მალავდნენ თავიანთ კავშირს უწმინდურ ძალებთან. “ჯადოქართა ნამოქმედარის შედეგები მრავალრიცხოვანი და სხვადასხვაგვარია, ისინი ადამიანს უგზავნიან საშინელ ავადმყოფობასა და სატანჯველს, ზოგჯერ მათი ზემოქმედებით ადამიანი კარგავს გონებას, მოძრაობის უნარს. ეს უკანასკნელი ხშირად დასჯის მიზნით არის გამოყენებული. ადამიანის გათვალვა და სხვა უბედურებები ხშირად ეგზავნებოდა სპეციალური შელოცვილი საგნების საშუალებით, რომელთაც ჯადოს ეძახდნენ. ამგვარ ჯადოს შეაგდებდნენ სახლში ან სადმე ახლოს ჩაფლავდნენ, ჯადო შეიძლება ყოფილიყო რაიმე ჩვეულებრივი ნივთი, ზოგჯერ თითქოს შემთხვევით დაკარგული. თუ გამოუცდელი ადამიანი აიღებდა მას და გამოიყენებდა, ყველაზე საშინელი სატანჯველი, ზოგჯერ სიკვდილიც კი ელოდა. ძნელი სათქმელია, რა საგანს იყენებდნენ ამა თუ იმ ჯადოს სახით, ყოველ ჯადოქარს თავისი მეთოდი ჰქონდა, ჯადო შეიცავდა საგნებს, რომლებიც ეკუთვნოდა იმ ადამიანს, ვისთვისაც იგი იყო განკუთვნილი ან ჯადოქრულ ძალასთან დაკავშირებულ რაიმე ნივთებს, ქილებში, რომლებსაც ამოთხრიდნენ, ან სადმე გადამალულს იპოვნიდნენ, აღმოჩნდებოდა ადამიანის თმა, მოჭრილი ფრჩხილები, ლაყე კვერცხი, ფუნა, ცხოველის ბეწვი. თუ ჯადოს შეამჩნევდნენ, მისგან თავის დაღწევა შესაძლებელი იყო გამოცდილი ჯადოქრის-მკითხავის მეშვეობით. მოჯადოება შესაძლებელია საკვებით ან სასმელით. ამ შემთხვევაში ჩვეულებრივ საკვებში ურევენ რაიმე შხამს.”(ვალენტინე ხარიტონოვა “შავი და თეთრი მაგია”)
ისე არა როგორც წლების წინ, მაგრამ პარასფსიქოლოგები, ნათელმხილველები და მკითხავების ნაკლებობას დდღესაც არ ვუჩივით, პირიქით, თითქოს ერთგვარი მოდაც დამკვიდრდა მათთან ურთიერთობისა. თუ მათ ნათქვამს დავუჯერებთ, მათი კლიენტები ძირითადად პოლიტიკოსები, მათი ცოლები და უნუგეშოდ შეყვარებულები არიან. ეს ადამიანები რა თქმა უნდა თავის თავს განგების ნიჭით დაჯილდოვებულს უწოდებენ, კატეგორიულად უარყოფენ რაიმე კავშირს ე.წ. შავ ძალებთან და ამბობენ, რომ საკუთარ თავში უთავსებენ ერთმანეთს ღვთიურ და ადამიანურ საწყისებს, ეხმარებიან ადამიანს ძნელბედობის ჟამს, როცა იგი შეწუხებულია საკუთარი ან ახლობლის ბედ-იღბლით, მათი წინასწარმეტყველება არ აღიქმება ჩვეულებრივი მკითხაობის სისტემად, არ მიიღებს მონაწილეობას უწმინდურ საქმეში და არ დაეხმარება უღირს ადამიანს. ჯადოს სპეციალისტებად ისინი ძირითადად მოლებს ასახელებენ, როგორც ამ საქმის პროფესიონალებს. მარნეულში და ჯანდარაში არა ერთი ცნობილი მკითხავია, რომლებსაც გარკვეული თანხის სანაცვლოდ ნებისმიერი სახის ჯადოს დამზადება შეუძლიათ. ხშირად გაგვიგონია, ამ ადამიანს ჯადო აქვსო გაკეთებული. ზოგს სჯერა ასეთი სასწაულების, ზოგს კი სასაცილოდაც არ ჰყოფნის (განსაკუთრებით მამაკაცებს), მაგრამ ფაქტი ის არის, რომ მრავალრიცხოვანი შეკითხვები ძირითადად უპასუხოდ რჩება, რატომ იცვლებიან ჩვენთვის საყვარელი ადამიანები თვალსა და ხელს შუა? ნინო კ. რომელიც მეუღლემ მიატოვა იხსენებს: “მე და ვასიკო ძალიან წყნარად, ნორმალურად და ვფიქრობ, ბედნიერად ვცხოვრობდით 9 წლის განმავლობაში. გვყავს 2 ბიჭი. ნორმის ფარგლებში არაფერი არ გვაკლდა, ერთმანეთს კარგად ვეწყობოდით და ვმეგობრობდით კიდეც, მეგობრები ან ჩვენთან იკრიბებოდნენ საღამოობით ან ჩვენ მივდიოდით სადმე დროის გასატარებლად. იყო ძალიან მზრუნველი და ყურადღებიანი ქმარი და მამა. შემდეგ სამსახური გამოიცვალა და ყველაფერი იქიდან დაიწყო, გახდა აგრესიული, სულ ვაღიზიანებდი, მეგონა სამსახურში ჰქონდა პრობლემები და სულ ვეკითხებოდი, მაგრამ ყველაფერი კარგად არისო, იძახდა. რაც დრო გადიოდა სულ უფრო ვშორდებოდით ერთმანეთს, ეს ის ადამიანი აღარ იყო ვინც მანმადე ასე მიყვარდა. ერთ დდღესაც დაბრუნდა სამსახურიდან, ჩაალაგა თავისი ნივთები და მითხრა სხვა ქალთან მივდივარო. ისინი ერთად მუშაობდნენ თურმე. ჩემი მდგომარეობა ალბათ წარმოგიდგენიათ და არ მინდა იმაზე ბევრი ვილაპარაკო, თუ როგორ დამეცა თავზარი. არც ის ვიცი რა გაუკეთა იმ ქალმა ასეთი. მას მერე ერთად აღარ გვიცხოვრია, ათასში ერთხელ თუ ნახავს ბავშვებს და ეკონომიურადაც არ გვეხმარება. ხშირად მიფიქრია და ბევრს უთქვამს ჩემთვის, რომ ჯადო აქვს გაკეთებული, მე აღარ ვუყვარვარ, მაგრამ შეიძლება ბავშვებიც ასე აღარ ახსოვდეს? ან შეიძლება ადამიანი ასე შეიცვალოს?”
ჯადოს არსებობას ეკლესიაც არ უარყოფს. როგორც მეტეხის ეკლესიის წინამძღვარმა, მამა აკაკიმ (რომელიც სწორედ კვეთებულის ლოცვებს კითხულობს ჯადოს მოსახსნელად) გვითხრა: “რა თქმა უნდა ჯადო არსებობს. ეშმაკი პირდაპირ მიილტვის ადამიანებისაკენ, მათი საქმე არის რაც შეიძლება მეტი ადამიანი გააუბედურონ, დააუძლურონ. სამწუხაროდ წარმატებით მოქმედებს ჯადო ურწმუნო ადამიანებზე, ამ ადამიანებს ხან სნეულება დაემართებათ, ხან რაღაც გაუმართლებლობა, ხან რაღაც სასოწარკვეთილებაში ჩააგდებენ, შეიძლება თვითმკვლელობითაც დამთავრდეს ვიღაცის სიცოცხლე და ეს ითვლება სწორედ ბოროტი ძალების წარმატებად. უამრავ ადამიანს მოუმართავს სამწუხაროდ და ინგრევა უამრავი ოჯახები. ჯადომ შეიძლება გამოიწვიოს სიკვდილი, იმიტომ, რომ ისეთი სახის სნეულებები ხდება, რომ თვით მედიცინა უძლურია მის მიმართ. თუკი ადამიანი მორწმუნეა, ეკლესიაში მოდის და აქ აღსარებით, სინანულით, ზიარებით ცხოვრობს, მასზე არანაირი ჯადო არ იმოქმედებს.” მამა აკაკი არ ეთანხმება იმ მოსაზრებას, რომ მკითხავები და ნათელმხილველები ღვთისაგან ზებუნებრივი ძალით არიან დაჯილდოვებული ადამიანის მომავლის შეცნობაში: “მჩხიბავები და ჯადოს მქმნელები მხოლოდდამხოლოდ ეშმაკის მსახურნი არიან და ცდილობენ რაც შეიძლება მეტი ადამიანი ჩააგდონ ცოდვაში.”
საპირისპიროს ამტკიცებს მკითხავი და ნათელმხილველი სელინა: “არსებობს როგორც კეთილი, ისე ბოროტი ძალები. ბოროტ ძალას შეუძლია ცხოვრება დაუნგრიოს ადამიანს, შავი მაგია უნდა მოიხსნას თეთრი მაგიით. ნებისმიერი სახის ჯადოს მოხსნა შემიძლია, ჯადო ბევრნაირია, მომაკვდინებელი, ასევე არის ჯადო, რომელიც აავადმყოფებს ადამიანს და ა.შ. მაგრამ მე თვითონ არასოდეს არ ვაკეთებ ჯადოს, რამდენი ფულიც არ უნდა გადამიხადონ. ამის გაკეთება არ შეიძლება. ამას ძირითადად აკეთებენ მოლები. და ის ვინც აკეთებს ამ შეკვეთას და ვინც უკვეთავს ამას, ისინი იქნებიან დასჯილნი. მათ ეს ყველაფერი დაუბრუნდებათ. მე ვგრძნობ ენერგეტიკით აქვს თუ არა ადამიანს ჯადო მართლა გაკეთებული. არის ბუნებაში რაღაც საიდუმლოებები, რომლებიც ეძლევა ადამიანებს. რატომღაც ჯადოს ყველა მღვდელი ვერ ხსნის, თუკი ისინი იძახიან, რომ ლოცვით მოიხსნება ჯადო, რატომ ვერ ათავისუფლებენ ადამიანს ჯადოსგან? იმიტომ. რომ მათაც უნდა ჰქონდეთ ამის ძალა ბოძებული. ასევე მაქვს მე ეს ძალა ბოძებული, როგორც მას მიეცა, ისე მომეცა მეც, ეს იმას არ ნიშნავს, რომ მე სატანისტი ვარ.”
ქ-ნი ლამარა მ. რძალს ადანაშაულებს, რომ მან მის ბიჭს ჯადო გაუკეთა: “ჩემმა ბიჭმა ეგ გოგო უნივერსიტეტში გაიცნო და მალევე შეუყვარდა, წინააღმდეგი ვიყავი მათი დაქორწინების რიგი მიზეზების გამო, ტყუილს ხომ ვერ ვიტყვი არ მომწონდა, თავხედი და უტიფარია, არ იყო ჩემი შვილისა და ჩვენი ოჯახის შესაფარისი, ჩემმა ბიჭმა არ დაგვიჯერა, მაინც მოიყვანა ცოლად, რაღას ვიზავდი? მივიღე ისე როგორც საჭირო იყო. მაგრამ სიკეთე ვერ დავანახე, იმხელა პრეტენზიები ჰქონდა, იმხელა, თან სულ მუდამ ჩემზე ეჩიჩინებოდა რაღაცეებს, ჩამოხმა ნერვიულობისგან ჩემი ბბიჭი, ხშირად ავადმყოფობდა, სულ მუდამ რაღაც ვითომ შინაურ წამლებს ასმევდა რძალი, ეს მოგარჩენსო, რა იყო კაცმა არ იცის. მე არ მაძლევდნენ ჩარევის უფლებას. აღარც ჩემი და აღარც მამამისის დანახვა უნდოდა, ცალკე გადავიდნენ ქირით, ვხვდებოდი ჩემი შვილის თავს კარგი ამბავი რომ არ იყო, ის გოგო ყველაფერზე იყო წამსვლელი. მეც მირჩიეს, რომ არის ქალი, რომელიც ჯადოს ხსნის, მივაგენი იმ ქალს, ახლა დავდივარ მასთან, ერთად ვლოცულობთ, ამ ბოლო დროს, სხვათაშორის, ჩემმა ბიჭმა დაიწყო ისევ ჩვენთან სიარული და ჩვენი მოკითხვა. ვიცი ისევ მე უნდა ვუშველო, მაგრამ ამ ყველაფერს დრო ჭირდება.”
ასეთი ისტორია ბევრია, მაგრამ ვერ გაიგებ, სად სიმართლის მარცვალი ურევია და სად გადამეტებული ტყუილი. რთულია იფიქრო, რომ 21-ე საუკუნეში ისევ არსებობენ მოლები და ჯადოქრები, მაგრამ როდესაც მსგავსი პრობლემები ჩვენს ირგვლივ ხდება და ჩვენს ახლობლებს ეხება, უნებურად გიპყრობს შიში იმისა, რომ სადღაც არსებობს იდუმალებით მოცული სამყარო და ნებისმიერი ჩვენთაგანი შეიძლება გახდეს ბოროტების მსხვერპლი.

# 46 –ე საარჩევნო უბანი

sაბურთალოს საარჩევნო ოლქის #46 საარჩევნო უბანში, რომელიც მდებარეობს ბუდაპეშტის ქუჩა # 3, ერთიან სიაში ამომჩეველთა რაოდენობა შეადგენდა 1566 ადამიანს. aრსებობს სპეციალური 7 კაციანი სია, რომლებშიც არის საუბნო საარჩევნო კომისიის წევრები. დღის 12 საათისთის დაფიქსირდა 237 ამომრჩეველი. 17 საათისთვის კი 552. არჩევნები ძირითადად მიმდინარეობდა მშვიდ გარემოში. თუმცა ადგილი ჰქონდა პატარა ინციდენტებსაც.

”ალიანსი საქართველოსათვის” წარმომადგენელმა ირაკლი კიკნაძემ, რომელიც არის სალომე ზურაბიშვილის პარტიის “საქართველოს გზის” წევრი, სიაში აღმოაჩინა 22 ადამიანი, რომლებიც არიან ან გარდაცვლილი ან საზღვარგარეთ მაცხოვრებელი ან მიწერილი. როგორც ირაკლი კიკნაძემ განაცხადა: “ამ 22 ადამიანის შესახებ ალიანსმა წინასწარ განაცხადა ცესკოში, რომ ამოეღოთ სიიდან, ვინაიდან ეს პიროვნებები ფიზიკურად ვერ შეძლებდნენ ხმის მიცემას. როგორც ხედავთ, ისინი დღეს ისევ სიაში არიან. ადამიანი, რომელიც იმყოფება საზღვარგარეთ, მასზე მითითებული უნდა იყოს, რომ ის საზღვარგარეთაა და იქ უნდა გააკეთოს თავისი არჩევანი. შეიძლება ეს ძალიან სერიოზული დარღვევა არ არის, მაგრამ ალიანსმა ამის შესახებ უკვე გააკეთა განაცხადი, შევადგინეთ ოქმი და ვნახოთ რა გამოხმაურება მოჰყვება.” ირაკლი კიკნაძე აცხადებს იმის შესახებაც, რომ მარკირების სითხე უხარისხოა. მას შემდეგ, რაც მან ხმა მისცა თავის საარჩევნო უბანში, ერთი საათის შემდეგ მან გადაამოწმა და დაბანილ ხელზე უკვე აღარ დაფიქსირდა მარკირების სითხე, ეს თავად ნაკადის მარეგულირებელმა რეზო ბარკავამაც დაადასტურა.
რაც შეეხება ბიულეტენებს, როგორც ზემოთ ვთქვით, ამომრჩეველთა რაოდენობა უაბნზე იყო 1566. ბიულეტენთა რაოდენობა კი შეადგენდა 1450-ს, რაც, როგორც საუბნო საარჩევნო კომისიის თავმჯდომარის მოადგილე, ნარგიზ ფერაძემ გვითხრა: ”ბიულეტენის ეს რაოდენობა ცესკოდან მოვიდა. არჩევნებზე არასოდეს არ მოდის ზუსტად იმდენივე ამომრჩეველი, რამდენიცაა დარეგისტრირებული. ეს ყოველთვის ასე ხდება. ამიტომ, ბიულეტენთა ეს რაოდენობა სრულიად საკმარისია.თუ დაგვაკლდება, სასწრაფოდ მოგვიტანენ ცესკოდან.”

ერთერთმა პიროვნებამ, რომელმაც არ ისურვა თავისი სახელისა და გვარის აფიშირება, თუმცა იყო 46-ე უბნის ამომრჩეველი, პრეტენზიით მიმართა კომისიის წევრებს, იმის შესახებ, რომ მის მისამართზე (კანდელაკის ქუჩა 11) დარეგისტრირებულია ვინმე გალინა ქართველიშვილი, რომელიც უკვე 10 წელია ცხოვრობს ისრაელში. როგორც ამ პიროვნებამ გვითხრა, მან არაერთხელ აცნობა კოორდინატორებს ამის შესახებ. ასევე ყველა წინა არჩევნებზე აცხადებდა ამ ფაქტის შესახებ, მაგრამ ამას არავითარი შედეგი არ მოჰყოლია. ეს ქალბატონი კვლავ სიაშია. ამომრჩეველთა ერთიან სიაში დაფიქსირდა არაერთი მისამართი (ამომრჩევლის), რომელზეც ბინის ნომერი არ იყო მითითებული. ამაზე საარჩევნო კომისიის თავმჯდომარემ, თამარ სიკინჭილაშვილმა გვითხრა რომ ”ცესკოდან მოვიდა ეს სიები და ჩვენ არაფერ შუაში არ ვართ.” ამომრჩეველმა, რომელიც ცხოვრობს კანდელაკის ქუჩა 8- ში, კომისიის წევრებს შეატყობინა იმის შესახებ, რომ მისი ოჯახის წევრები თამაზ და ქეთევან თუშიშვილები საზღვარგარეთ იმყოფებიან და მიუხედავად იმისა, რომ მან შეატყობინა ამის შესახებ კოორდინატორებს, ისინი მაინც აღმოჩნდნენ სიაში. ეს ქალბატონი დაინტერესებული იყო იმით, რომ მისი ოჯახის წევრების სახელები და გვარები არ გამოეყენებინათ უცხო პირებს ხმის მისაცემად.

46-ე უბანზე შემოვლა ჩაატარეს ევროსაბჭოს უცხოელმა დამკვირვებლებმა. როგორც უნო სილბერგმა განაცხადა: “ჩვენი მთავარი მისია არჩევნების დაკვირვებაა, რეკომენდაციებს კი არ ვიძლევით. ხვალ 11 საათზე სასტუმრო ”ამბასადორში” გაიმართება პრესკონფერენცია და იქ წარმოვადგენთ არჩევნების შესახებ პირველად დასკვნას.”

46- ე საარჩევნო უბანზე ხმის დათვლა დილის 5 საათზე დასრულდა. 1566 ადამიანიდან არჩევნებში მონაწილეობა მიიღო 692-მა ადამაინმა, რაც შეადგენს 47%-ს. როგორც კომისიის თავმჯდომარის მოადგილემ, ნარგიზ ფერაძემ გვითხრა: “ წინა არჩევნებთან შედარებით, მოსახლეობის აქტივობა საკმაოდ ნორმალური იყო, ბოლო წლების განმავლობაში არც ერთხელ არ გამოცხადებულა ამდენი ამომრჩეველი, ვფიქრობ, ეს ძალიან კარგი ფაქტია.”გამარჯვებული თბილისის მერის თანამდებობაზე, გახდა (კონკრეტულად ამ უბანში) გიორგი უგულავა 319 ხმით, ადგილობრივი თვითმმართველობის წარმომადგენლობითი ორგანოს-საკრებულოს არჩევნებში გაიმარჯვა “ერთიანი ნაციონალური მოძრაობამ” 287 ხმით. მაჟორიტარი დეპუტატი გახდა ზაზა სინაურიძე (”ერთიანი ნაციონალური მოძრაობა”) 285 ხმით. დათვლილი ხმების მიხედვით, ბალანსი დაჯდა და 46-ე საარჩევნო უბნის ხმები გადაეცა საოლქო კომისიას.


ელენე ცინცაძე

გვანცა გორდეზიანი

წინასაარჩევნო აგიტაცია საჯარო სკოლაში

წინასაარჩევნო აგიტაცია საჯარო სკოლაში

საქართველოს მეცნიერებისა და განათლების სამინისტრომ არჩევნებთან დაკავშირებით, რეკომენდაცია მისცა ყველა საჯარო სკოლის ადმინისტრაციას, სასწავლო პროცესის დროს არ დაუშვას სკოლის ტერიტორიაზე წინასაარჩევნო აგიტაციის ჩატარება, რათა არ შეფერხდეს სასწავლო პროცესის მიმდინარეობა. თუმცა წინასაარჩევნო კამპანიის მიზნებისთვის საჯარო სკოლების გამოყენების რამდენიმე შემთხვევას მაინც ჰქონდა ადგილი.
14 მაისს, # 55-ე საჯარო სკოლაში მიხეილ სააკაშვილი სკოლის სასადილოს გახსნას დაესწრო, მან ჟურნალისტებთან ისუბრა 30 მაისის ადგილობრივი თვითმმართველობის არჩევნებზე და ყურადღება გაამახვილა ყველა დონის ხელისუფლების შეთანხმებული მოქმედების მნიშვნელობაზე. პრეზიდენტმა საჯარო სკოლებში მიმდინარე ცვლილებების წარმატებით განხორციელება მერიის, განათლების სამინისტროსა და პრეზიდენტის ერთობლივ მუშაობას დაუკავშირა და ამომრჩეველს მოუწოდა 30 მაისს პასუხისმგებლობით მოეკიდონ საკუთარ არჩევანს. ტელეკომპანია “მაესტროს” მიერ მომზადებულ სიუჟეტში 55-ე სკოლის მოსწავლეები ყვებიან, რომ პრეზიდენტის დასახვედრი ღონისძიების ორგანიზების მიზნით, სკოლაში სწავლის პროცესი ორი დღის განმავლობაში შეჩერებული იყო, გარდა ამისა, კადრში ჩანს პრეზიდენტის დასახვედრად შენობის წინ გამოსული სკოლის მოსწავლეები, რომლებსაც აცვიათ მაისურები წარწერით: “გიგი უგულავა თბილისის მერი.” მაისურზე ასევე გამოსახულია # 5. სკოლის მოსწავლეების წინასაარჩევნო აგიტაციაში ჩაბმა ეწინააღმდეგება კანონს “ზოგადი განათლების შესახებ” საქართველოს კანონის მე-13 მუხლის პირველ პუნქტს, რომელიც კრძალავს სასწავლო პროცესის პოლიტიზაციას და ამავე კანონის მე-3 მუხლის მიხედვით, გარანტირებულია საჯარო სკოლის დამოუკიდებლობა პოლიტიკური გაერთიანებისაგან. ამას გარდა, შეუსაბამოა საქართველოს განათლებისა და მეცნიერების სამინისტროს მიერ საჯარო სკოლების ადმინისტრაციისთვის გაწეულ რეკომენდაციასთან.
ახალგაზრდა იურისტთა ასოციაციის საარჩევნო პროექტების კოორდინატორის, ნინო ლომჯარიას განცხადებით: “ეს არის იგივე ზოგადი განათლების შესახებ კანონის მოთხოვნების დარღვევა და ჩვენ მივმართეთ განათლების სამინისტროს, რომ გენერალურ ინსპეკციას შეესწავლა ეს ფაქტი და მიეღო შესაბამისი ზომები სკოლის ადმინისტრაციის მიმართ.” რაც შეეხება თავად 55-ე სკოლის დირექტორs, ქ-ნმა თამარ ლომჯარიამ ამ საკითხზე კომენტარის გაკეთება არ ისურვა და განაცხადა, რომ: “მე მაქვს დუმილის უფლება და შეგიძლიათ დაწეროთ რაც გინდათ, მე ამ საკითხზე კომენტარს არ გავაკეთებ.” გამოკითხული რამდენიმე მასწავლებისგან მხოლოდ ის შევიტყვეთ, რომ არც ერთი მათგანი იმ დღეს სკოლაში არ ყოფილა, იმ უბრალო მიზეზის გამო, რომ მაინცდამაინც ამ დღეს მათ გაკვეთილები არ ჰქონდათ ცხრილით, ამიტომ არავინ არ იცის რა ხდებოდა იმ დღეს სკოლაში, მათ შორის არც დაცვის თანამშრომელმა და არც მშობლებმა. როგორც ზემოთ მოგახსენეთ, პრეზიდენტის ვიზიტთან დაკავშირებით, 2 დღის განმავლობაში სკოლაში სასწავლო პროცესი იყო შეწყვეტილი. სამართლიანი არჩევნების თავმჯდომარის, ეკა სირაძის განცხადებით: “სწავლის პროცესი არ უნდა შეწყდეს არანაირ საარჩევნო გარემოსთან მიმართებაში, შესაბამისად სწავლის დროს არ უნდა მოხდეს არც ერთი კანდიდატის, ნებისმიერი პარტიის კანდიდატის სკოლაში შესვლა და რაღაცა ტიპის აგიტაციის სკოლაში ჩატარება. ძალიან ცუდი ფაქტია ის, რომ თვითონ ბავშვებს ეცვათ უგულავას გვარით გამოსახული მაისურები, მართალია ბავშვები ამომრჩევლები არ არიან, მაგრამ მათი მშობლები არიან ამომრჩევლები და შესაბამისად ეს ფაქტი შეიძლება ჩაითვალოს ადმინისტრაციული რესურსის ცუდად გამოყენებად. მე ვერ წარმომიდგენია, ნებისმიერ სხვა კანდიდატს შეძლებოდა იგივეს გაკეთება, რაც ამ შემთხვევაში ბატონ უგულავას შემთხვევაში მოხდა. ეს კიდევ ერთი დამატებითი ფაქტია იმისა, რომ ყველა კანდიდატი ნამდვილად არ არის თანაბარ პირობებში ჩაყენებული. აქ ერთი ნიუანსია, როგორ მოხდა ამ მაისურების დამზადება, როგორი იყო მითითება, რჩევა თუ ნება-სურვილის მიხედვით, შეიძლებოდა, რომ ბავშვს არ ჩაეცვა თუ მას არ სურდა, იყო თუ არა შეთანხმებული ეს მათ მშობლებთან, ეს ყველაფერი არის დასადგენი.” პრეზიდენტს არც უფროსკლასელი მოსწავლეები დახვდნენ, როგორც მე-7 კლასის მოსწავლეებმა ნუნუკა მებურიშვილმა, თათა ხარებაშვილმა და თაკო ჩხეიძემ გვითხრეს, ამ დღეს სკოლაში მხოლოდ პატარები დაიბარეს. ”მაესტროს” ეთერში გასული კადრების შემდეგ, მოვძებნეთ სწორედ ის მოსწავლეები, რომლებიც უშუალოდ ჩანდნენ სიუჟეტში. ზუკა ძნელაძე და ნიკა ჯამასპიშვილი 55-ე სკოლის მე-6 კლასელები არიან, სწორედ ისინი ყვებოდნენ “მაესტროს” კორესპონდენტთან, რომ მათ ეს მაისურები გიგი უგულავამ აჩუქა ვაკის პარკში გამართულ ღონისძიებაზე, ჩემს შეკითხვაზე კი, თუ საიდან ჰქონდათ 5 ნომრიანი მაისურები, თავდაპირველად ვეღარ გაიხსენეს, მერე კი გაახსენდათ, რომ ერთ-ერთის დედამ მოიტანა საიდანღაც და მათ ის თავისი სურვილით ჩაიცვეს. ზუკამ და ნიკამ იმის შესახებაც გვიამბეს, თუ როგორ მისცა მათ საყვედური სკოლის დირექტორმა, ზემოთ ხსენებული მაისურების ჩაცმის გამო, მას შემდეგ, რაც ეს სიუჟეტი ეთერში გავიდა. როგორც მათმა დამრიგებელმა (რომელიც გახლავთ სკოლის დირექტორის, ქ-ნ თამარ ჭაბაშვილის და), ქ-ნმა თეკლა ფერაძემ მოგვახსენა, მისთვისაც მოულოდნელი იყო როდესაც პრეზიდენტის ვიზიტის დროს, მოსწავლეები ამ მაისურებით დაინახა,: “ჩემთვისაც ძალიან მოულოდნელი იყო ეს ამბავი და სურვილი მქონდა გამეხადა ბავშვებისთვის ეს მაისურები, მაგრამ ამ აჟიოტაჟში ვეღარ მოვახერხე, თანაც მე უფლებაც არ მქონდა, თუკი ბავშვი ასე ჩაცმული გამოუშვეს სახლიდან, მე როგორ უნდა გამეხადა? ეს ხომ ერთგვარად ბავშვის უფლებების დარღვევაცაა? ისიც არ ვიცი საიდან მოიტანეს ეს მაისურები. რაც შეეხება გაკვეთილებს, ტარდებოდა და სწავლა არ შეწყვეტილა, ეს სიუჟეტი კი სიმართლეს არ შეესაბამებოდა. ძალიან ვწუხვარ, რომ ასეთი სიუჟეტი გაკეთდა, როგორ შეიძლებოდა ჩვენ მიგვეთითებინა ბავშვებისთვის რა უნდა ჩაეცვათ?” ”საერთაშორისო გამჭვირვალეობა საქართველოს” აღმასრულებელი დირექტორის, ვახტანგ კობალაძის განცხადებით: “აშკარა არის ზემოქმედება წინა საარჩევნო პროცესზე, სკოლა უნდა იყოს თავისუფალი ყოველგვარი პოლიტიკისაგან, მითუმეტეს ბავშვები, რომლებიც არ არიან ჯერ საარჩევნო უფლების მქონე, არ შეიძლება მათი გამოყენება წინასაარჩევნო პროცესში და საარჩევნო კამპანიაში მათი ჩართვა. კანონის ფარგლებში, ყველა დარღვევაზე პასუხისმგებელმა პირებმა უნდა აგონ პასუხი. წინააღმდეგ შემთხვევაში ეს საჯარო განცხადებები უმაღლესი თანამდებობის პირებისა: არ უნდა მოხდეს ადმინისტრაციული რესურსების გამოყენება, მოწოდებები, რომ ამომრჩევლები არ დამორჩილდნენ სხვადასხვა ფუჭ დაპირებებს, ეს დარჩება ცარიელ სიტყვებად. ჩვენ დიდი იმედი გვაქვს, რომ მოხდება რეაგირება ამაზე, თუმცა ჯერჯერობით მაინცდამაინც სანუგეშო სიტუაცია ამ მხრივ არ არის.”
“ერთიანი ნაციონალური მოძრაობის” წარმომადგენელს, კოკი იონათამიშვილს არაფერი საგანგაშო იმაში არ მიაჩნია, რომ პრეზიდენტმა 55–ე სკოლაში საჯაროდ გამოხატა მხარდაჭერა გიგი უგულავას მიმართ, მისი განცხადებით: „პრეზიდენტს აქვს სრული უფლება და ეს არ არის მხოლოდ ქართული ნორმა, რომ მხარდაჭერა გაუწიოს თავის ფავორიტს. მე დავინტერესდი ამ ფაქტით (გულისხმობს 55–ე სკოლაში პრეზიდენტის ვიზიტზე) და როგორც ვიცი, ეს ბავშვები არ ყოფილან სასადილოში ამ მაისურებით, (თუკი იხილავთ “მაესტროს” მომზადებულ სიუჟეტს, ნახავთ, რომ ასეთი მაისურით სასადილოშიც იყო შესული მოსწავლე _ ავტ.) რამოდენიმე ბავშვი მართლაც იყო და ეს ტელეკამერებიდანაც ჩანდა, მაგრამ ისინი იყვნენ გარეთ და თუ ბავშვები იყვნენ გარეთ, ამაში ცუდს ვერაფერს ვერ ვხედავ. თუ იყვნენ შიგნით, ეს არ არის კარგი და არ არის ნორმალური გარემო, რომ ბავშვები აუცილებლად სკოლაში დადიოდნენ რომელიმე პარტიის მხარდამჭერი მაისურებით, თუმცა ეს მხოლოდ ჩემი პოზიციაა და მხოლოდ ლაპარაკი იმაზე, რომ კანდიდატები ამით არათანაბარ პირობებშია, არ არის სწორი. ჩვენზე იძახიან, რომ კანონი განსაკუთრებით არ გვიყვარს და არ ვართ ობიექტურები, ამ ხალხის გასაგონად ვამბობ, რომ არაფერში არ გვჭირდება უკანონობა და ადმინისტრაციული რესურსების უკანონოდ გამოყენება, რადგან ვგრძნობთ, რომ ხალხი მხარს გვიჭერს.”

Ganaxlebuli “Maestro”

ტელეკომპანია “მაესტრო”-ში ცვლილებებია. სულ რამოდენიმე დღის წინ ცნობილი გახდა, რომ გენერალურმა დირექტორმა, მამუკა ღლონტმა კომპანიის მენეჯერობა ეროსი კიწმარიშვილს გადააბარა. სტუდია “მაესტრო” 1995 წლის თებერვალში შეიქმნა და ის ეთერში გადიოდა სახელმწიფო ტელევიზიის I და II არხებზე სხვადასხვა გასართობი გადაცემებით. 2001 წელს ტელეკომპანიამ პირველად საქართველოში შექმნა “პირველი სტერეო”-ს ეთერში მუსიკალურ-გასართობი არხი, შემდეგ კი მოღვაწეობა გააგრძელა ტელეკომპანია “ევრიკაზე”. ამ ეტაპზე მიმდინარეობს აქტიური მუშაობა ფინანსების მოზიდვაზე. კიწმარიშვილი მოლაპარაკებებს აწარმოებს ევროკავშირისა და აშშ-ს განვითარების სააგენტოებთან, ასევე სოროსისა და ევრაზიის ფონდების წარმომადგენლებთან.



კიწმარიშვილის განცხადებით: “საერთაშორისო ორგანიზაციების აზრით, საქართველოში დემოკრატიის დღევანდელი მაჩვენებელი გახდა მიუღებელი. ისინი ღიად წერენ, რომ ამ ქვეყანაში დემოკრატიის ხარისხი ძალიან დაბალია. ბუნებრივია, მათ რეკომენდაციებს ისმენენ სხვადასხვა ქვეყნების ხელისუფლების წარმომადგენლები და ყალიბდება გარკვეული დახმარების პრიორიტეტები, ამიტომ დამოუკიდებელი მედია ხდება ერთ-ერთი სერიოზული პრიორიტეტი საქართველოში დახმარების თვალსაზრისით. ასევე არის თანხის მოზიდვის ძალიან გავრცელებული ფორმა დასავლეთში ტელეშემოწირულობები, რომელიც ტელემარათონის გზით შეიძლება იქნეს მობილიზებული. თუ მოსახლეობას აქვს სურვილი ჰქონდეს დამოუკიდებელი ტელევიზია და ობიექტური ინფორმაცია, ისინი უნდა ჩაერთვნენ ამ პროექტში. ასევე შევთავაზეთ იგივე პოლიტიკურ პარტიებს, რომლებიც დღეს ოპოზიციურ მხარეს წარმოადგენენ, რომლებსაც აქვთ სერიოზული პრობლემა თავიანთი ინფორმაციის დისტრიბუციისა და კამპანიის წარმოებისა, ღია ფორმით, მათი პირადი სახსრებით, პარტიული სახსრებით, შეექმნათ ფონდი, რომელიც სასტარტოდ მიეხმარებოდა “მაესტროს”. ოღონდ ამ ფინანსებს არ უნდა ქონდეს ე.წ. კომისია, არ უნდა იყოს რაიმე პოლიტიკური ვალდებულება ტელევიზიასა და პოლიტიკურ პარტიას შორის.” კიწმარიშვილი პირობას იძლევა, რომ საინფორმაციო გამოშვებები იქნება ძალიან ობიექტური, სხვა შემთხვევაში ვერ მიიღებენ იმ დახმარებას, რასაც დონორები იძლევიან. თუ არ იქნება დაბალანსებული პოლიტიკა, ბუნებრივია ამას დაერქმევა მიკერძოებულობის სახელი და ამ შემთხვევაში დონორები უარს იტყვიან მონაწილეობა მიიღონ ამ პროექტში.
მაესტროს განხორციელებული აქვს 50-ზე მეტი სხვადასხვა პროექტი. ინფო ბოქსში ყოველთვის ითვლებოდა ნოვატორ კომპანიად. მან პირველმა საქართველოში შექმნა იუმორისტული გადაცემა “პა-სეანსი” და პირველმავე შესთავაზა მაყურებელს საქართველოს ისტორიაში პირველი რეალური შოუ “ამტანი”. ტელეკომპანიის დამფუძნებლის, მამუკა ღლონტის განცხადებით: “მაესტრო იყო ყოველთვის კონკურენტუნარიანი, წლების განმავლობაში ჩვენ ამას ვამტკიცებდით, დაწყებული პირველი იუმორისტული პროგრამიდან “პა-სეანსი”, დამთავრებული ბოლო ყველაზე წარმატებული პროექტით-რეალითი შოუებით.”

2007 წლის ნოემბერში “მაესტრომ” საქართველოს კომუნიკაციების ეროვნულ კომისიას ოფიციალურად მიმართა ახალი ლიცენზიის მინიჭების მოთხოვნით, საქართველოში მიმდინარე მოვლენების გამო “მაესტრო” შემეცნებით-გასართობი ლიცენზიის ნაცვლად მაუწყებლობის შესახებ არსებული კანონის გათვალისწინებით, საზოგადოებრივ-პოლიტიკურ ლიცენზიას ითხოვდა. ამ პერიოდში გაჩნდა რამოდენიმე ახალი გადაცემა “უკომენტაროდ”, “პროფესია ჟურნალისტი” და სხვები. კომისიის მხრიდან გადაწყვეტილების მიღება ხუთი თვის განმავლობაში ჭიანურდებოდა, მაშინ, როდესაც ეროვნულ მარეგულირებელ კომისიას არათუ ერთ თვეში უნდა მოეხდინა რეაგირება მოთხოვნაზე, არამედ “მაუწყებლობის შესახებ” საქართველოს კანონის 45-ე მუხლის “ბ” ქვეპუნქტის თანახმად შეეძლო მაუწყებლობის სახეობის შეცვლა მოდიფიცირების გზით. 2008 წლის 14 მარტიდან ზემოთ ხსენებული გადაცემების მაუწყებლობა შეჩერდა, რადგანაც საქართველოს კომუნიკაციების ეროვნული კომისიის გაფრთხილებით, ეს გადაცემები არ თავსდებოდა სტუდია “მაესტროს” ლიცენზიის ფორმატში. 4 აპრილს კომუნიკაციების ეროვნულმა კომისიამ უარი განუცხდა “მაესტროს” ლიცენზიის შეცვლაზე. 2008 წლის ოქტომბერში ქრისტიან-დემოკრატიული პარტიის ლიდერი გიორგი თარგამაძე პარლამენტში ინიციატივით გამოვიდა “მაესტროსთვის” ლიცენზიის მოდიფიცირების თაობაზე. პარლამენტის გადაწყვეტილებით, ტელეკომპანიას საზოგადოებრივ-პოლიტიკური გადაცემების დამზადების და გაშუქების უფლება მიეცა. 2008 წლის 2 დეკემბრიდან, რვა თვიანი პაუზის შემდეგ, “მაესტროს” ეთერში განახლდა ყველა ეს გადაცემები. მაგრამ, როგორც მამუკა ღლონტმა განაცხადა:D”მაესტროს” დღეს ურთულესი ფინანსური მდგომარეობა აქვს, ჩემი ბოლო ნაბიჯიც სწორედ აქედან იყო გამოწვეული, იმიტომ, რომ ან უნდა დამეხურა “მაესტრო” და მერწმუნეთ მეორე დღეს ყველა იტყოდა, რომ პრეზიდენტმა ფული გადამიხადა ამისთვის ან უნდა გამეყიდა ან მენეჯმენტით უნდა მეშველა. ამიტომაც მივიღე ეს გადაწყვეტილება, ეროსი კიწმარიშვილს აქვს დიდი გამოცდილება და გარკვეული წარმატებები ამ დარგში. მე ისევ მივიღებ მონაწილეობას მენეჯმენტში, მექნება საშუალება ვეტოს დადების და შემეძლება გავუწიო კონტროლი იმ საქმიანობას, რასაც წარმართავს ბატონი ეროსი და ვთვლი, რომ მისი მენეჯერობა კომპანიას მხოლოდ კარგ შედეგს მოუტანს.

განახლებული “მაესტრო”

” იანვრის შუა რიცხვებიდან “მაესტრომ” კიდევ Eერთი სატელევიზიო პროექტი შესთავაზა მაყურებელს- საპროტესტო აქციის არასტანდარტული ფორმით. შოუს მთავარმა გმირმა, მუსიკოსმა და მსახიობმა გიორგი გაჩეჩილაძემ (იგივე “უცნობი”) საკუთარი სურვილით აღიკვეთა თავისუფლება და დაიწყო ცხოვრება ციხის იმპროვიზირებულ საკანში. ამ პერიოდში არხის რეიტინგმა პიკს მიაღწია, თუმცა მამუკა ღლონტის თქმით: “ ჩვენ ვეღარ ვაგრძელებდით მუშაობას, რადგანაც სახელმწიფო გვექცეოდა უკანონოდ. მათ მონოპოლიზირებული აქვთ სარეკლამო ბაზარი და მას შემდეგ, რაც ჩვენი არხი გახდა ოპოზიციური, აშინებდნენ ბიზნესმენებს, რომ არ მოეტანათ ჩვენთან რეკლამა. ამ მონოპოლიზაციით ისინი ფაქტიურად აკოტრებენ ტელევიზიას. მაგრამ, მე მგონი დროა ყველა გამოფხიზლდეს და დაეხმაროს თავისუფალ სიტყვას, იმიტომ რომ თავისუფალი პრესისა და სასამართლოს გარეშე ამ ქვეყანაში არაფერი არ მოხდება.”
სტუდია “მაესტროს” პროგრამები საკაბელო ქსელის მეშვეობით ვრცელდებოდა. AGB-ს (დღესდღეობით ერთადერთი კომპანიაა საქართველოში, რომელიც სატელევიზიო რეიტინგებს იკვლევს) კვლევის მონაცემების მიხედვით, საქართველოს მასშტაბით ამ ტელეკომპანიას დაახლოებით 2, 315 000 მაყურებელი ჰყავდა ბოლო რამოდენიმე წლის განმავლობაში. ამჟამად მიმდინარეობს მუშაობა იმაზე, რომ მაესტროს მაუწყებლობა გავიდეს სატელიტზე.
ოპტიმისტური განწყობა აქვს “მაესტროს” ჟურნალისტს ნინი ჟიჟილაშვილს, მისი განცხადებით: “ვინაიდან, ჩვენ არ გაგვაჩნდა საკმარისი რესურსები იმისათვის, რომ თავად ჩაგვეტარებინა გამოძიებები, გავსულიყავით რეგიონებში, ყოველდღიური ინფორმაცია მიგვეღო რა ხდებოდა კონფლიქტის ზონაში და ასე შემდეგ, ჩვენ დამოკიდებულები ვიყავით სხვა ტელეკომპანიების მიერ მოძიებულ ინფორმაციებზე. დარწმუნებული ვარ, “მაესტროზე” შეიქმნება თავისუფალი გარემო, იმიტომ რომ ბატონ ეროსის აქვს ამის გამოცდილება და მის ინტერესში არანაირად არ არის ჟურნალისტების ინტერესის დაზარალება და მისი მხრიდან იქნება ალბათ დიდი ხელშეწყობა იმისა, რომ ჩვენ მაქსიმუმი გავაკეთოთ. მე ვისურვებდი მეტ მობილიზაციას, მეტ ტექნიკურ ბაზას იმისათვის, რომ ჩვენ მოვედოთ მთელ ქვეყანას და შევქმნათ ეფექტური პროდუქტი. “
განსხვავებული პოზიცია აქვთ ტელეკომპანია “კავკასიის” ჟურნალისტებს ნინო ჯანგირაშვილსა და დავით აქუბარდიას. ისინი სკეპტიკურად უყურებენ ეროსი კიწმარიშვილის დანიშვნას “მაესტროზე”, ნინო ჯანგირაშვილმა გულახდილად ისაუბრა ამ თემაზე გაზეთ “ალიასთან” მიცემულ ინტერვიუში: “რატომ ენდნენ ეროსის წარმოუდგენელი რამეა. ეროსი არ არის ის განძი და იმ რეპუტაციის ტელევიზიონშჩიკი, ვიფიქრო, აი ჩავაბარე ტელევიზია და მომეშვა გულზე. მე ვწუხვარ, რომ ეროსი კიწმარიშვილის მისვლით “მაესტროში” ძალიან ცუდად განვითარდება მოვლენები. მე გელაპარაკებით როგორც მოქალაქე. როგორც კონკურენტი არ ვფიქრობ, რომ შეიძლება ჩვენი სერიოზული კონკურენტი გახდეს “მაესტრო”. ჩვენ გვაქვს ჩვენი ხაზი, დავრჩეთ ობიექტურ ტელევიზიად.” დავით აქუბარდიამ კი უარი თქვა კომენტარის გაკეთებაზე ამ საკითხთან დაკავშირებით და ეს უარი იმით დაასაბუთა, რომ “საერთოდ არ აინტერესებს რა მოხდება მაესტროზე.”
მამუკა ღლონტის განცხადებით ცნობილი გახდა, რომ ყველა ახლანდელი თანამშრომელი ისევ იმუშავებს “მაესტროზე” და ასევე კიწმარიშვილის სურვილით, აქცენტი გაკეთდება ახალი თაობის ჟურნალისტებზე, მაგალითად საზოგადოებრივ საქმეთა ინსტიტუტის სტუდენტებზე, რომლებიც ჯერ კიდევ არ არიან ცნობადი სახეები საზოგადოებაში. რაც შეეხება მათ სამომავლო გეგმებს, ამაზე თავად კიწმარიშვილი საუბრობს, რომ “მაესტრო” გახდება კლასიკური საინფორმაციო არხი, 24 საათიანი მაუწყებლობით. იქნება საინფორმაციო გამოშვებები, დოკუმენტური პროექტები, თოქ-შოუები, საგამოძიებო ჟურნალისტიკა და ა.შ. “ჩვენ შევქმნით ძლიერ, ავტორიტეტულ ცქერად ტელევიზიას, რომლის საინფორმაციო სამსახურის დამოუკიდებლობას განსაზღვრავს სპეციალური საბჭო, რომელიც გააკონტროლებს, თუ რამდენად დამოუკიდებელია საინფორმაციო სამსახური, მე ვთავაზობ მედია თანამეგობრობას თავად გადაწყვიტონ თუ ვინ იქნებიან ბორდის წევრები, იქნება ეს სახელისუფლებო ენჯეოებიდან თუ პირიქით. რაც უფრო კრიტიკული იქნება ბორდი, ოღონდ სამართლიანად კრიტიკული ჩვენთვის უკეთესი იქნება. დიდი სურვილი მაქვს, იყოს მეორე ბორდიც, რომელიც განსაზღვრავს ჩვენი მაუწყებლისა და საერთაშორისო ორგანიზაციების ურთიერთობას. ამას ერქმევა საერთაშორისო საბჭო, შემდგარი 5-6 ადამიანისგან და აქ მინდა მოვიწვიო უცხოეთში აღიარებული ადამიანები მედიის დარგში.” კიწმარიშვილის სურვილია, რომ კომპანიაში სამუშაოდ დარჩნენ მფლობელების დიდი ნაწილი: “ეს არ არის ვინმე ინვესტორის მიერ შექმნილი კომპანია, ეს არის ამ ხალხის მიერ დაწყებული ნოლიდან და ძალიან დიდ პატივს ვცემ მათ, მინდა, რომ ჩვენ გვქონდეს აქტიური თანამშრომლობა, მათთვის ეს პროექტი არის არამარტო ქონებრივი ასპექტი, არამედ მათი კეთილდღეობის შემადგენელი ნაწილი.”
როგორ განხორციელდება მათი იდეები და გახდება თუ არა კომპანია მართლაც ობიექტური, მიუკერძოებელი ტელევიზია, ამას ჩვენ სულ მალე გავიგებთ, რადგან “მაესტრო” ახალი მაუწყებლობით ეთერში გასვლას თებერვლის შუა რიცხვებიდან გეგმავს.

პაპილომა ვირუსი

“როგორ ავიცილოთ თავიდან საშვილოსნოს ყელის კიბო”

პაპილომა ვირუსით გამოწვეული
საშვილოსნოს ყელის კიბო

დღეისათვის განვითარებულ ქვეყნებში ინტენსიურად მიმდინარეობს ქალის სასქესო ორგანოების სიმსივნეების ნაადრევი დიაგნოსტიკა, ე.წ. ონკო-პრევენციული გამოკვლევა. მთელ მსოფლიოში 60 000-მდე ქალს უვითარდება საშვილოსნოს ყელის კიბო, ყოველწლიურად 30 000 მანდილოსანი იღუპება ამ სენით და 225 000-ზე მეტი ქალბატონი ცხოვრობს ამ დაავადებით (ნამკურნალევი თუ სხვა). ყველა ეს დაავადება თუ სიკვდილი საშვილოსნოს ყელის კიბოს შემთხვევებისა, შესაძლებელია თავიდან აიცილონ ქალბატონებმა დროული მკურნალობის შემთხვევაში.

კიბოს ნაადრევი დიაგნოსტიკა საშუალებას იძლევა მისი დროული გამოვლინებისა და მკურნალობისა. საქართველოში XX საუკუნის მე-2 ნახევრიდან მიმდინარეობს კიბოსწინარე დაავადებების დიაგნოსტიკა და დროული მკურნალობა. ექიმი-გინეკოლოგის, ნინო ხელაშვილის თქმით, “ამჟამად მდგომარეობა ქალთა გამოკვლევისა შემცირებულია და ეს ძირითადად ბრალდება მათ სოციალურ მდგომარეობას. მათ არ შეუძლიათ დროულად მიმართონ ექიმს. ამის გამო საქართველოში ქალთა სასქესო ორგანოების სიმსივნეების რიცხვმა 3-ჯერ მოიმატა. მათ შორის პირველ ადგილზე არის სარძევე ჯირკვლების კიბო და მეორეზე კი საშვილოსნოს ყელის სიმსივნე. საშვილოსნოს ყელის კიბოს წინ უძღვის ხანგრძლივად მიმდინარე პათოლოგიური პროცესები-სხვადასხვა მიზეზებით გამოწვეული. ერთ-ერთი მიზეზი უამრავ მიზეზთა შორის არის პაპილომა ვირუსით გამოწვეული საშვილოსნოს ყელის ეროზია.”

პაპილომავირუსული ინფექცია დიდი ხნის წინათაა ცნობილი. ის ჯერ კიდევ აღწერილია ძველი ბერძენი ექიმების მიერ სახელწოდებით- “კონდილომები”, რაც სიტყვასიტყვით მეჭეჭს ნიშნავს. ნინო ხელაშვილის განცხადებით: “პაპილომავირუსული ინფექციის გადაცემა ხდება მხოლოდ სქესობრივი გზით. ძირითადად ის აავადებს ახალგაზრდა ქალებს, რომლებიც ეწევიან აქტიურ სქესობრივ ცხოვრებას. საშვილოსნოს ყელის კიბო ვითარდება საშვილოსნოს ყელში, ის საშვილოსნოს ის ნაწილია, რომელიც გადადის საშოში. კიბო ვითარდება იმ შემთხვევაში, როცა საშვილოსნოს ყელის უჯრედები დაზიანებულია ადამიანის პაპილომა ვირუსით. უჯრედები ხდებიან ატიპიური და იწყებენ ზრდას.”

არსებობს პაპილომა ვირუსის 100-ზე მეტი ტიპი, ამათგან 40-ს გააჩნია უნარი დააინფიცირონ სასქესო ორგანოს მიდამოები როგორც ქალებში, ასევე მამაკაცებში. პაპილომა ვირუსის ზოგ ტიპს შეუძლიათ გამოიწვიონ სასქესო მეჭეჭი, მაშინ, როცა 15 მაღალი რისკის მქონე ტიპს უნარი აქვთ საშვილოსნოს ყელის უჯრედებად გადაგვარების 10-დან 15 წლამდე პერიოდის განმავლობაში. http://www.ecca.info/

უნდა აღინიშნოს, რომ ვირუსი ძალიან გავრცელებულია და შესაძლოა დაინფიცირება ნებისმიერ დროს მოხდეს. დიდი ნაწილი მიმდინარეობს უსიმპტომოდ და არის შემთხვევები, როდესაც შეუმჩნევადი ფორმა პაპილომა ვირუსის თავისთავად ქრება ინფიცირებიდან 24 თვეში. მაგრამ პრობლემები ჩნდება მაშინ, როდესაც ქალის ორგანიზმი ვერ ებრძვის პაპილომა ვირუსს და საშვილოსნოს ყელში წარმოქმნილი ატიპიური ცერვიკალური უჯრედები დროთა განმავლობაში პროგრესირებს კიბომდე, თუ არ მოხდა დროული გამოვლენა, დიაგნოსტიკა და დაზიანებული უჯრედების მოშორება. თუმცა როგორც უკვე ავღნიშნეთ ამ გადაგვარებულ უჯრედებს არ ახასიათებთ რაიმე ხილული ნიშნები და სიმპტომები და ერთადერთი გზა მათი აღმოჩენისა გახლავთ საშვილოსნოს ყელის სკრინინგი. საქართველოში საშვილოსნოს ყელის სკრინინგული გამოკვლევა რეკომენდირებულია 25-დან 60 წლამდე ასაკის ყველა ქალისათვის, არა აქვს მნიშვნელობა არიან თუ არა სექსუალურად აქტიურნი. თბილისში არსებობს სპეციალური ეროვნული სკრინინგ ცენტრი, სადაც ატარებენ შესაბამის გამოკვლევას, თუმცა ექიმი-ინფექციონისტის მაია ბუწაშვილის თქმით: “საქართველოში ქალების ცოდნის დონე საშვილოსნოს ყელის კიბოსთან დაკავშირებით სამწუხაროდ ძალიან დაბალია, არადა პაპილომა ითვლება ყველაზე გადამდებ ინფექციურ ვირუსად. ახლახან სადაზღვეო კომპანიებმა ქალთა გამოკვლევის ანაზღაურება დაიწყეს და იმედი გვაქვს ეს დაეხმარება მანდილოსნებს დროულად ჩაიტარონ საშვილოსნოს ყელის სკრინინგი.” “ნეოკლინიკის” სტატისტიკის მიხედვით ყოველთვიურად 15-20 ქალბატონი აკითხავს ცენტრს და იტარებს საშვილოსნოს ყელის სკრინინგს, რაც ძალიან ცოტაა. ამჟამად მიმდინარეობს მუშაობა პროექტზე “500 ქალის მოსაზრება პაპილომა ვირუსის შესახებ”, რომელსაც ინფექციონისტი მაია ბუწაშვილი ხელმძღვანელობს: “ ჩვენი მიზანია რაც შეიძლება მეტი ინფორმაცია გავავრცელოთ პაპილომა ვირუსის შესახებ. ყოველდღიურად მსოფლიოში 600-ზე მეტი ქალი კვდება საშვილოსნოს ყელის კიბოთი, ამიტომ აუცილებელია გაესაუბროთ თქვენს ექიმს იმ პროფილაქტიკური საშუალების შესახებ, რომელსაც შეუძლია დაგიცვათ ამ დაავადებისაგან. პაპილომა ვირუსით დაინფიცირებულია ყოველი მეათე ადამიანი მსოფლიოში, ეს დაახლოებით 630 მილიონია, თუმცა რათქმაუნდა ყველა მათგანს არა აქვს ვირუსის ის ტიპი, რომელიც იწვევს კიბოს. ჩვენ გამოვკითხავთ 500 მანდილოსანს (შემთხვევით შერჩეულს), გვაინტერესებს რა იციან მათ პაპილომა ვირუსის შესახებ, როგორ უყურებენ ვაქცინაციას და რა მეთოდებით მკურნალობენ საკუთარ თავს. პირველი შედეგები მზად იქნება იანვრის ბოლოსათვის.”

როგორც ავღნიშნეთ მამაკაცებიც ინფიცირდებიან HPV ვირუსით და შემდგომ უკვე ძალიან რეალურია გადასცენ ეს ინფექცია თავიანთ პარტნიორებს. არის იშვიათი შემთხვევები, როდესაც პაპილომა იწვევს სასქესო ორგანოს სიმსივნეს. ი.ლ.-ს განცხადებით, “მას მოულოდნელად გაუჩნდა ხორცმეტები, ე.წ. მეჭეჭები, სასქესო ორგანოზე თუმცა გამონაყარი პერიოდულად ქრებოდა და ისევ ჩნდებოდა 6-7 თვის განმავლობაში. გამონაყარის გახშირებას თან ერთვოდა ტკივილები და დისკომფორტი. გართულებული იყო შარდვაც. სექსუალური აქტის შემდეგ აღენიშნებოდა სისხლდენა.” საჭირო გახდა კონსულტაცია უროლოგთან, რომლის დახმარებითაც მოხდა ონკოლოგიურ საავადმყოფოში დაზიანებული უჯრედების არა ერთჯერადი “მოწვა”. თუმცა სანამ ი.ლ. საბოლოოდ განიკურნებოდა, დაინფიცირდა მისი მეუღლე ე.კ. (ოღონდ პაპილომა ვირუსის არა იმ ფორმით, რომელიც კიბოს იწვევს), რომელსაც ასევე ხანგრძლივი მკურნალობა დასჭირდა და ე.კ.-ს თქმით “ახლა მათი პაპილომა ვირუსი აღარ არის აქტიური, თუმცა საჭიროა სისტემატიურად გინეკოლოგთან და უროლოგთან კონსულტაციები.”

ევროპის ქვეყნების მედიკოსებმა შემოგვთავაზეს საშვილოსნოს ყელის კიბოს საწინააღმდეგო ვაქცინაცია. ვაქცინა უზრუნველყოფს საიმედო დაცვას სულ მცირე 5 წლის მანძილზე ადამიანის პაპილომა ვირუსის იმ ტიპებისაგან, რომლის წინააღმდეგ ის შეიქმნა. ვაქცინაცია მიმდინარეობს სამჯერადად 6 თვის განმავლობაში. ვაქცინაციის ჩატარება განსაკუთრებით ეფექტურია გოგონებისათვის გარდატეხის ასაკში, სანამ ისინი დაიწყებენ აქტიურ სქესობრივ ცხოვრებას. მოწოდებული ვაქცინა უსაფრთხოა და კლინიკურმა მონაცემებმა აჩვენა, რომ მას მინიმალური გვერდითი მოვლენები აქვს. “ადამიანის პაპილომა ვირუსის საწინააღმდეგო ვაქცინაცია ამცირებს საშვილოსნოს ყელის კიბოს განვითარების რისკს, თუმცა ვერ უზრუნველყოფს აბსოლუტურად ყველა ტიპის ვირუსისგან სრულ დაცვას მაშინაც კი როდესაც აცრა ჩატარებულია, საჭიროა რეგულარული კონსულტაცია გინეკოლოგთან ან სკრინინგი”-აცხადებს ექიმი-გინეკოლოგი, ნინო ხელაშვილი.

ევროპის საშვილოსნოს ყელის კიბოს ასოციაცია (ECCA) მიიჩნევს, რომ საშვილოსნოს ყელის კიბოსა და მისი პროფილაქტიკის შესახებ ცოდნის გაზრდა გამოიწვევს ამ დაავადების სიხშირის შემცირებას. სწორედ ამ მიზნით, ECCA-მ 2007 წელს ჩაუყარა საფუძველი ევროპაში საშვილოსნოს ყელის კიბოს საწინააღმდეგო კვირეულს, რათა გაზრდილიყო საშვილოსნოს ყელის კიბოსა და მისი პრევენციის შესახებ ინფორმირებულობის დონე ევროპელ ქალბატონებსა და პოლიტიკოსებსა და საზოგადოებრივი ჯანდაცვის ოფიციალურ წარმომადგენლობაში. მას შემდეგ, ეს კვირეული იმართება ყოველ წელიწადს სხვადასხვა ქვეყნებში მაგალითად: ბელგიაში, ხორვატიაში, პორტუგალიაში, საბერძნეთში, ესპანეთში, სერბეთში, ჩეხეთში, სლოვაკეთში, უკრაინაში და მათ შორის საქართველოშიც. ჩვენი ქვეყნის პირველი ლედი, ქ-ნი სანდრა რულოვსი აქტიურად არის ჩართული ამ პროგრამაში და მასთან ერთად სხვა საზოგადო მოღვაწეებიც.

“სიბრძნის მარგალიტი” წარმოადგენს თვალსაჩინო და ცნობილ სიმბოლოს. მისი მატარებელი ადამიანები გამოხატავენ თავიანთ მხარდაჭერას საშვილოსნოს ყელის კიბოს პრევენციის მიმართ. “სიბრძნის მარგალიტის” გაყიდვის შედეგად შემოსული თანხა ხმარდება საშვილოსნოს ყელის კიბოს საწინააღმდეგო სხვადასხვა პროექტს.

დღესდღეობით საქართველოში უამრავი ქალბატონი არსებობს დაავადებული საშვილოსნოს ყელის კიბოთი, რომელიც გამოიწვია სწორედ პაპილომა ვირუსმა. ზუსტი სტატისტიკური მონაცემები შეგვიძლია ვიხილოთ ოქტომბრის თვის ბოლოს, რადგან სწორედ ახლა მიმდინარეობს აღრიცხვა, თუმცა ექიმების თქმით, მათი რიცხვი მატულობს დღითიდღე და თუკი საზოგადოება იქნება საკმარისად ინფორმირებული ამ დაავადების შესახებ, შესაძლებელია რიგ შემთხვევებში თავიდან ავიცილოთ საშვილოსნოს ყელის კიბო.